പരിശുദ്ധ പിതാവ്, ലിയോ പതിനാലാമൻ പാപ്പായുടെ അംഗീകാരത്തോടെ, വിശുദ്ധരുടെ നാമകരണ കാര്യങ്ങൾക്കായുള്ള ഡിക്കസ്റ്ററി സഭയിൽ പുതിയതായി ആറു പേരെ കൂടി ധന്യൻ പദവിയിലേക്ക് ഉയർത്തി.
ഒക്ടോബർ മാസം ഇരുപത്തിനാലാം തീയതി, വിശുദ്ധരുടെ നാമകരണ കർമ്മങ്ങൾക്കായുള്ള ഡിക്കസ്റ്ററിയുടെ പ്രീഫെക്ട് കർദിനാൾ മർച്ചേല്ലോ സെമരാരോയ്ക്ക്, അനുവദിച്ച കൂടിക്കാഴ്ചാവേളയിൽ, പരിശുദ്ധ പിതാവ്, ലിയോ പതിനാലാമൻ പാപ്പാ, കത്തോലിക്കാ സഭയിൽ പുതിയതായി ആറു പേരെ കൂടി ധന്യൻ പദവിയിലേക്ക് ഉയർത്തുവാനുള്ള ഡിക്രിക്ക് അംഗീകാരം നൽകി.
പെറുവിലെ ബൈബിൾ പ്രചാരണത്തിന്റെ തുടക്കക്കാരനായ, ജർമ്മൻ വംശജനായ ഫ്രെഡറിക് കൈസർ ഡെപ്പൽ എന്ന മെത്രാനാണ് ധന്യൻ പദവിയിലേക്ക് ഉയർത്തപ്പെട്ടവരിൽ ഒരാൾ. 1993 സെപ്റ്റംബർ 26-ന് ലിമയിൽ വച്ച് അന്തരിച്ച അദ്ദേഹം, ആൻഡീസ് പർവ്വതനിരകളിലെ ജനങ്ങൾക്കിടയിൽ പ്രവർത്തിക്കുന്നതിനായി ‘സഹോദരിമാരുടെ സന്യാസിനി സമൂഹത്തിന്’ രൂപം നൽകി.
വടക്കുകിഴക്കൻ ഇന്ത്യയിൽ ദീർഘകാലം മിഷനറിയായി സേവനമനുഷ്ഠിച്ച സാലേഷ്യൻ മെത്രാൻ ഓറെസ്റ്റെ മാരെംഗോ (Oreste Marengo), ദിബ്രൂഗഡ്, തേസ്പൂർ രൂപതകളുടെ മെത്രാനായും തുറാ രൂപതയുടെ അപ്പസ്തോലിക അഡ്മിനിസ്ട്രേറ്ററായും പ്രവർത്തിച്ചു. കേരളത്തിൽ നിന്നുള്ള വൈദികരെയടക്കം പ്രോത്സാഹിപ്പിച്ച അദ്ദേഹം ഇന്ത്യ-പാകിസ്ഥാൻ യുദ്ധകാലത്ത് അഭയാർത്ഥികൾക്കായി സേവനമനുഷ്ഠിക്കുകയും ചെയ്ത ഇടയനായിരുന്നു.
ഫോക്കോളാരെ പ്രസ്ഥാനത്തിലെ (Focolare Movement) പ്രമുഖ അംഗവും ‘ലൂമിനോസ’ എന്ന് സ്നേഹപൂർവ്വം വിളിക്കപ്പെടുകയും ചെയ്ത അർജന്റീനിയൻ സന്യാസിനി മാർഗരിറ്റത്ത ബവോസി (Margarita Bavosi), മിലാൻ അതിരൂപതയിലെ ദരിദ്രർക്കും ഭിന്നശേഷിക്കാരായ കുട്ടികൾക്കുമായി സ്ഥാപനങ്ങൾ നിർമ്മിച്ച് സേവനം ചെയ്ത ഫാ. ദോമെനിക്കോ പോളിയാനി (Domenico Pogliani) എന്നിവരും ധന്യ പദവിയിലേക്ക് ഉയർത്തപ്പെട്ടവരാണ്.
വാർദ്ധക്യത്തിൽ പ്രമേഹരോഗത്താൽ കാഴ്ചയും കേൾവിയും നഷ്ടപ്പെട്ടിട്ടും “എനിക്ക് കാണാനോ കേൾക്കാനോ കഴിയില്ല, എങ്കിലും ഞാൻ വിശ്വസിക്കുന്നു” എന്ന് പ്രഖ്യാപിച്ച ഇറ്റലിയിലെ കാലാബ്രിയയിൽ നിന്നുള്ള വൈദികൻ അലെസ്സാൻഡ്രോ വിത്തെറ്റി (Alessandro Vitetti), പാദ്രെ പിയോയുടെ ആത്മീയ പുത്രനും കപ്പൂച്ചിൻ സന്യാസിയുമായ ബ്രദർ ദനിയേലെ എന്നിവരാണ് മറ്റ് രണ്ട് ധന്യർ.
