പാലാ: സ്നേഹഗിരി മിഷനറി സന്യാസിനി സമൂഹത്തിൻ്റെ സ്ഥാപകനും പുണ്യശ്ലോകനുമായ കൈപ്പൻപ്ലാക്കൽ അബ്രാഹം അച്ഛൻ്റെ പന്ത്രണ്ടാം ചരമവാർഷികം പാലാ ളാലം പള്ളിയിൽ ഭക്തിപൂർവ്വം ആചരിച്ചു. ചരമവാർഷികത്തോടനുബന്ധിച്ച് നടന്ന പ്രത്യേക പ്രാർത്ഥനകൾക്കും ദിവ്യബലിക്കും നിരവധി വിശ്വാസികളും സ്നേഹഗിരി സമൂഹാംഗങ്ങളും സാക്ഷ്യം വഹിച്ചു.
ളാലം പള്ളിയിലെ ചടങ്ങുകൾക്ക് ശേഷം, സ്നേഹഗിരി മിഷനറി സന്യാസിനി സമൂഹത്തിൻ്റെ വിവിധ ഭവനങ്ങളിൽ നിന്നായി എത്തിയ സിസ്റ്റേഴ്സ് അബ്രാഹം അച്ഛൻ്റെ സ്മരണകൾ ഇരമ്പുന്ന ചെത്തിമറ്റം ദേവദാൻ സെൻ്റർ സന്ദർശിച്ചു. അച്ഛൻ അവസാനമായി താമസിച്ചിരുന്ന മുറിയിലും അവിടെ ഒരുക്കിയിട്ടുള്ള മ്യൂസിയത്തിലും പ്രാർത്ഥനകൾ അർപ്പിച്ച ശേഷമാണ് അവർ മടങ്ങിയത്.
